Tuesday, October 30, 2007

يعنى ايه اخوان مسلمين؟

الاول وقبل كل شئ
بعد ملاحظة ان فى العديد من الاخوه المدونين حصرونى فى تيار معين بسبب طريقتى فى اللبس
فوجب عليا التوضيح
يا رفاق التدوين رغم ان طريقة هدومى توحى انى من الاخوان فانا لست منهم
وان كنت احترمهم
ورغم انى من عاشقين جمال عبد الناصر
فانا لست ناصريه
ورغم انتمائى السابق جدا للحزب الوطنى فانا وبكل فخر
لا احب هذا الحزب من ا الى ى
والله على ما اقول شهيد
*******************
بعد هذ التوضيح فى حاجه كده عايزه اسئل فيها هو يعنى ايه اخوان مسلمين؟
يعنى ايه تطبيق الاسلام فى الحياه؟(ده على فرض جهلى بانه ازاى)بس ما علينا
طب هنتبقوا فى اى مجال؟
وباى شكل؟
وباى اسلوب؟
بمعنى ان عباءة الاسلام على مر التاريخ عبائه فضفاضه تحتوى كل شئ بداخلها
فمثلا فى عهد رسول الله (صلى الله عليه وسلم)كانت هناك قبيله مسلمه
تحيا على النظام الاشتراكى
بالاضافه ان الخلافه الاسلاميه كانت على النظام الراس مالى
ناهيك عن الدول الاسلاميه اللى قامت فى دول جنوب شرق اسيا
الساده الاخوان بقى عايزين ايه؟؟؟؟؟؟؟
بجد انا حاسه انهم حطين منشتات عريضه وكبيرا دون تفاصيل
وبجد بقى دى حاجه خنقانى اوى
لان اى حزب سياسى محترم لازم يعتمد على التفاصيل
على الاليات المتصوره لتنفيز فكرته العامه
طب يا جماعه على الاقل تكون الاليه دى كمان فكره عامه بس اكثرا تفصيلا
انما كده
كله سايح على كله ومش فى حاجه ملموسه
وعلشان مش حد يفتكر انى بهاجمهم والله ابدا انا بس عايزه افهم الصوره الضبابيه اللى محتويا الجماعه دول
بجد من حقى افهم
:(

Sunday, October 28, 2007

الانسان بلا حزن ذكرى انسان؟




حكايتها عاديه جدا


لا تحتمل حتى ان تكتب فى سطور


فى هى قلب وفقط


انسانه تلخصت حواسها فى قلبها وفقط


هو الشئ الوحيد الذى يحركها رغم انها تنفى ذلك بشده وتنكره


وجاء يوم وزاد فى قلبها نبضه لشخص


كانت تراه غير كل العيون


تراه اجمل من ان يرى هو نفسه


تلك النبضه كانت اكبر من ان تحتملها بمفردها


فصارت تكتب وتكتب وتكتب


تبوح بما يختلج فى صدرها من كلمات قد لا تكون مترابطه


لكنها كانت تستريح حين تبوح بحبها


وكأى أى حدوتة حب اولها نغم


اشواق لهفه واعذب الكلمات تنطق وارق الحروف تهمس


لكن لا شئ يدوم لا شئ على الاطلاق


بدون مقدمات بدون صراخ او مشادات


او خصام


تلاشى تماما من حيتها


انسحب تماما بهدوء


تاركا ورائه الصمت يعتصرها عذابا ويذيدها اغتربا


قصتها عاديه تماما مثلها كمثل ملاين من اهل الحب


لكن لما يكون العذاب هو الشئ العادى


ولماذا تكون اغلب نهيات قصص اهل الحب تنحصر فى ذلك فقط؟ وان تعددة اشكله؟


انه الحب


انه الشئ الوحيد الذى نعرف به انفسنا وندرك بيه ما حولنا


اهكذا دئما نحول ما يسعدنا الى حزن مقتم


هل حقا الانسان بلا حزن ذكرى انسان؟

Thursday, October 25, 2007

والتقينا اخيرا

طب هو انا ممكن اقول ايه
اصل فى كذا حاجه عايزه اقولها عن كونى حضرت الامسيه الشعريه امبارح
بتاعت تضامن مع حرية الصحافه فى نقابة الصحفيثين
اهم حاجه فى الامسيه انى شوفت ناس ما كنت اتوقع انى اقابلهم فى حياتى
مش لكونى مش مهتمه بالموضوع
لكن لكون فرصة انى اجتمع بيهم بعيده كل البعد وتكاد تكون مضحكه
فانا لم اعتاد ابدا على الذهاب الى الامسيات الشعريه
او اى امسيات على الاطلاق
طبعا كنت بشوفها لو اتذاعة على التلفزيون
هو الصراحه من ساعت ما بدئت تدوين
وانا حصل طفره فى حياتى
مش حصلت وانا فى الجامعه اللى كنت بعتبرها مرحله منتهى التغيرات
امممممممممممممم
اقول الشخصيات اللى شوفتهم هناك من الشعراء والكتاب
الخال عبد الرحمن الابنودى

الاستاذ محمد عبد القدوس
بلال فضل

الشاعر احمد بخيت
الشاعره ايمان بكرى

والاستاذ وائل الابراشى
الشيخ

كانوا كلهم رائعين
لكنى لم اذكر بينهم الاكثر اهميه بنسبه لى
الاستاذ ابراهيم عيسى

اول ما وقع نظرى عليه كنت فى منتهى السعاده
انى هقدر اكلمه اخيرا واقوله هو اد ايه مأثر فيا جدا
فانا شديدة الاعجاب بما يخطه قلم هذا الرجل
طبعا قابلت رفقاء الدرب التدوينى
هند و خديجه مالك حسن
عمر الهادى وحرنكش
براء ودعاء
وعبد المنعم ومينا
وائل عباس وشهناز
اغلبهم قال كلمه
لكن كان الاكثر لباقه وبجد كان متحدث جيد هو مينا ذكرى
الندوه كانت فى المجمل رائعه
ورغم ان مقبلت الاستذ ابراهيم عيسى الاهم والاكثر روعه
الا انى اكتشفت جهلى بشاعره رائعه هى ايمان بكرى
بجد كان شعور رائع وصادم انى اسمع السيده الرائعه دى

كمان كنت سعيده بالابنودى واحمد بخيت
بجد كنت سعيده الكام ساعه دول

Tuesday, October 23, 2007

كفاره يا حج كمبيوتر والصيانه للجدعان





لم اكن اتخيل هذا الدور الكبير والحيز الذى يملئه الكمبيوتر والاتنر نت فى حياتى


من يوم 28 رمضان والجهاز مهبل او بيستهبل معيا


مره يهنج ويجيب جاز


بس الصراحه الراجل ادنا تنبيه كتير انه بعافيه شويه وعايز صيانه


يعنى مثلا


اول حاجه قطع صوت قولت ولا يهمنى مش فارقه معيا الاغانى


وبعدين قام الموس تقل ولا اتهزيت مدام بيتحرك يبقى رضى


الكى بورد راسه والف سيف مش يكتب غير انجليزى ولا همنى اعتبرتها تدريب على مكان الحروف الانجليزى


الجهاز بقى اتخنق منى وقام فاصل ميه ونور


ومش عارفه ليه حسيت ان الجهاز مشمئز منى وناقص ينطق ويقولى


انتى مش وش تكنولوجيا


:)


وبدائت رحلة الاصلاح


بان احمد اخويا اخد الكيسه لمحل شيك كده فتح فى الشارع بتعنا


المهم بعد عدة مدولات على الموبيلات بينى وبين احمد اخويا والراجل اللى هيصلحه لينا او هكذا كنت اظنه


لانى بعدين عرفت انه ولد صغير عنده 19 سنه


المهم قال ان المشكله فى البور صبلاى


قولناله غيره


قام غيره وظبط الوندوز واخد 55جنيه زاى الباشا


لما احمد جاب الكيسه وظبطنها قامت اخيرا بس كسيت ان الموس تقيل شويه


قولت بس يبقى العيب كده فى الموس


انزل يا حج احمد هتلنا موس غيره


وادى 20 جنيه تانى


(يا خرب بيتك يا اليشع)


جاب الموس واشتغل حلوا والجهاز بقى زاى الفل


الكلام ده كان يوم الاربعاء سادس يوم العيد


تانى يوم بعد ما رجعت من الشغل جيت اشغل الجهاز ماما قالتلى احمد بيقولك كلميه قبل ما تشغلى الجهاز


ليه ماله؟


المهم اتصلت باحمد قالى الجهاز مش راضى يولع


قولتله ده انا اولع فى امه ؟ليه؟


قالى مش عارف


قومت متصله بخبير العائله فى الكمبيوتر


اوركل مان زاى ما بيقول على نفسه


محمد ابن عمى


وحكتله على اللى حصل وقولته انى خايفه يكون العيب فى البورده


قالى لا ان شاء الله مش فيها


معرفش هو قال كده علشان شافنى خايفه على البورده ولا ايه؟


المهم شلت الكيسه على قلبى وروحت للولد تانى علشان يشوف ايه


قالى سيبهالى شويه


سبتها وكنت نازله بظروفه بعديها انا وماما فعدينا عليه


ايه الاخبار يا ريس


البورده ضربت


%^$^#^%$#^$&$%$#%$#^%&


ده كان احساسى طبعا


بس فى احتمال انى اعرف اشحنها


قولت فى عقلى هو انا هشحن ايه ولا ايه


الموبيل ولا الرصيد ولا الست الحجه بورده


بعت لاحمد اخويا ولمحمد ابن عمى كلمنى شكرا علشان كنت خايفه على الرصيد


لانى عايزه نعمل قمه ثلاثيه فى الوضع الراهن


احمد اول ما قولتله البورده اتوهم وقالى فكك منى وانا وراجع من الشغل هبقى اعدى على الولد


محمد ابن عمى بقى كان قافل الموبيل اصلا


عرفت بعد كده انه هو كمان فصل شحن


:)


المهند بعد كام ساعه كده احمد اتصل بيا وقالى جمله واحده بس


البقاء لله فى البورده


وعديكم اقمت شعائر الحداد المستميت


وعقدت العاقده واستنيت الفقيده لما ترجع


احمد حبيبى اول ما شاف البؤس على وجهى


قالى على ايه يا بنتى انزلى بكره غيريها ولا يهمك


مش كدبت خبر تانى يوم نزلت خليت الولد غيرها وظبط الوندوز تانى


وجبت الكيسه وركبتها ولسه بشغلها الشاشه مش راضيه تقوم


الله يخرب بيت الكفره


ايه تانى يا بنت الناس مالك


قال الشاشه مش مستحمله الرزليوشن علشان صغيره


اتصلت باحمد واول ما سمع صوتى وانا بقوله ازيك يا مان


قالى لو نطقتى اى كلمه فيها ك او ب او ت او ر او يه هقفل السكه


فانا تداركت الموقف وروحت قولت الشاشه


ورغم ان الكلمه مش فيها اى حرف من الحروف المحظوره الا ان احمد قفل برضوا السكه


:(


بعد دقيقه اتصل وقالى مالها


قولتله على اللى حصل


راح قالى انسيه وكبرى دماغك


بس مين ده الكمبيوتر ده الحاجه الوحيده اللى بلاقى فيها نفسى


قولته هات انت بس اسطوانت اونذ ومش ليك دعوه


لما جبها احمد صطبته ومش عرفت الشاشه


واخيرا دخلت على الانتر نت وها انا ذا اكتب مره اخرى


الموضوع ده بقى اخد منى من يوم 13 اكتوبر لحد ما بكتب ليكن دلوقتى


Friday, October 12, 2007

افطار المدونين يوم مختلف فى حياتى



اقولكم بقى ليه هو يوم مختلف

لانى انتقلت من التفاعل التدوينى من خلف شاشة الكبيوتر الى التفاعل المباشر بالمواجهه مع رفقاء الدرب التدوينى

:D

حلو الدرب التدوينى دى

لمهم اقولكم هو يوم كمان مختلف فى حياتى ليه

انا لما جتلى الدعوه طبعا م كان عندى اى امل انى اروح الفطار

لانى عمرى فى حياتى ما فطرت فى رمضان بره البيت لوحدى

وعمرى ده قرب يتم 23 سنه الشهر الجاى

علشان كده لما قولت لماما على موضوع الفطار كان من باب

fun

عنى بس لكن على غيرالعاده لقيت ماما كده موافقه مبدائيا لحد ما بابا يجى ونعرض عليه الموضوع

ولما بابا جه بعد محاولات ومشاورات ويفضل باب يبتسم ويقولى سام بنوتى تفطر بره البيت ويضحك

صل الصراحه عمرها ما حصلت

المهم بعد شوية محايله وعلشان خطرى يا بابا وكده يعنى وافق اخيرا

وكنت مبسوطه اوى اوى بصراحه انى رايحه مع انى كنت خايفه زاى التلميذ اللى رايح مدرسه مش يعرفها اول يوم دراسى

انا بذات بقى اعلم الناس بهذا الاحساس المخنق

وعلشان اخفف من حدة التوتر ده فضلت احاول اعرف مين من المدونين اللى انا اعرفهم رايح

رغم ان المعرفه دى اصلا ما هى الا الاحاديث اللى على المسنجر بس

ومش اخبى عليكم فكرت كذا مره انى مش اروح

وفضلت الفكره دى فى دماغى لحد وانا داخله الاصانصير طالعه للكافتريه

وكل اللى فى دماغى جملة علاء والى الدين فى فيلم الناظر ساعت المظاهر "لف وارجع تانى لف وارجع تانى"ساعت ما البوليس حاصرهم

واللى لحقنى قبل ما انفذ كان محمود صاحب مدونة شبشب بصباع

قابلته فى الاصانصير وبمجرد ما قولت الدور التامن

قالى تبع المدونين

وكانى لاقيت طوق النجاه

قولتله كويس انى لقيت حد

لمهم طلعت لقيت شوية ناس كده قاعدين اتعرفنا على بعض

امير=انا كده ومفيش غير كده عندى



ومحمد ومحمد ومحمد

صراحه التلاته دول مش بقيت مميزه محمد مين من محمد

المهم بدائت الناس تيجى لحد ما لما يقرب من 40مدون

طبعا لا ادعى انى اتعرفت عليهم كلهم

كن على الاقل عرفت هما مين

بس فى ناس كنت عرفاهم قبل كده






طبعا الباقى كانوا كتير جدا انى اكتب اساميهم

بس كلهم ناس محترمه وبجد ارتحتلهم اوى

المهم قاعدنا على الطربزات علشان الفطار

واستنينا نسمع الاذان

ورغم وجود جامع قريب منا الا انه استحال ان احنا نسمع الاذان

وفطرنا بعد تمحيص بقى فى السعات وربطها بوقت الاذان

المهم فطرنا اخيرا

بعد الفطار قعدنا فى حلقه كبيره وكل واحد عرف نفسه واسمه واسم المدونه

كانت الناس ظريفه

بجد كان يوم مختلف فى حياتى ابتدئا من

تجربة انى افطر لوحدى بره

وكمان انى اتعرفتعلى الشخصيات التى يجب ان اصفها بانها مختلفه بشكل او باخر

الصراحه اكتر شخصيه حسيت انى عايزه اعرفها اكتر هى طنط ندى

بجد الست دى حبتها على طول

يمكن لان روحها خفيفه

معرفش

اه صحيح فى كمان مينا كان لذيذ جدا
كمان كان فى ناس كان نفسى بجد انهم كانوا يبقوا موجودين

فى الفطار علشان اتعرف عليهم




واهمهم جدا جدا الشخصيه المحترمه المهذبه للغايه احمد رفعت

كل سنه وكل المدونين بخير

وكل سنه واحنا مدونين

:)

Sunday, October 7, 2007

المدونه محتجبه اعتراضا على حبس الصحفيين


المدونه محتجبه اعتراضا على حبس الصحفيين

Saturday, October 6, 2007

مصر يا اما يا بهيه







مصر ياما يا بهيه

يا ام طرحه وجلابيه

الزمن شاب وانتي شابه

هوا رايح وانتي جايه

جايه فوق الصعب ماشيه

فات عليكي ليل وميه

واحتمالك هوا هوا

وابتسامتك هيا هيا

تضحكي للصبح يصبح

بعد ليله ومغربيه

تطلع الشمس تلاقيكي

معجبانيه وصبيه يا بهيه


مصر ياما يا سفينه

مهما كان البحر عاتي

فلاحينك ملاحينك

يزعو للريح يواتيا

للي ع الدفه

صنايعي

واللي ع المجداف

زناتي

واللي فوق الصاري كاشف

كل ماضي وكل اتي

عقدتين والتالته تابته

تركبي الموجه العفيه

توصلي بره السلامه

معجبانيه وصبيه

يا بهيه

*********************

كل سنه وانتى طيبه يا حبيبتى
فى عيد نصرك
اللى بقالى زماااااااااااااااان اوى نفسى اشوفه من تانى
والله وحشانى يا مصر وانا عايشه فيكى
مشتاقه لحضنك يا بهيه