صورة المصرين لدى العرب ......الصيت ولا الغنى

هو انا حكيت قبل كده على انى اد ايه بحب كتبى وكشاكيلى

مش فاكره

بس على العموم انا بعشق الكتب والكشاكيل

لدرجة انى يمكن محتفضه بكتب يرجع تاريخا الى ايام ما كنت فى ابتدائى

من كام يوم كده كان مودى مش اد كده

فقولت ارجع ادور فى دفاترى القديمه

اللى غالبا بلاقى فيها نفسى

لان غالبا لما كنت بذاكر كنت بدون اى فكره او كلمه جات على بالى فى اللحظه اللى بتيجى فيها

علشان لما ارجع ليها تانى اعشها تانى

المهم

فتحت كشكولى الكبير اللى كنت بلخص فى المواد بتاعتى فى سنه رابعه كليه

كان فى ماده انا درستها عن صورة الذات والاخر فى الصراع العربىالاسرائيلى

الماده دى بلا فخر جبت فيها امتياز على غير عادتى يعنى

ورغم انى درستها قبل كده كويس الا انى لما قرتها المره دى لفت نظرى حاجه غريبه جدا

من ضمن الحاجات اللى بتناقشها الدراسه دى

صورة المصرين لدى الفلسطنين واليمنين والتونسين ولدى المصرين نفسهم

الاول هقولكم المصرين قالوا ايه على نفسهم هى الصفات التاليه

"الطيبه ، الكرم ، الاخلاص ، المرح ، خفة الدم ، والتدين ، حب بعضهم البعض ، الوطنيه ، البساطه ، الذكاء ، الاصاله"

صورة المصرين بقى لدى الفلسطنين

" الطيبه ، خفة الدم ، الكرم ، حب السلام ، البساطه ، العاطفيه ، حب الفن ، مساعدة الاخرين ، حب المعرفه ، متعلمون"

(مساعدة اخرين مين يجوا يشوفوا اللى معتصمين فى شارع القصر عينى من تلات تيام)

صورة المصرين لدى التونسين

"خفة الدم ، الكرم ، حسن العشره ، اجتماعيون ، الوطنيه ، تشجيع القوميه العربيه ، اصحاب حضاره ، التسامح ، المجامله ، الغرور"

(تشجيع القوميه العربيه مين؟ اكيد الدراسه دى يا اما قديمه يا اما اللى اتسئلوا فى الدراسه كان اخر حاجه شفوها فلم ناصر 56)

صورة لدى اليمنين

"الطيبه ، المرح ، السذاجه ، المجامله ، الذكاء ، القبليه ، حب المعرفه ، التعصب ، اللامبالاه ، عدم الاهتمام بالوقت"

( صقم والله فى اللا مبالاه وعم احترام الوقت)

المهم لو جمعنا كل اللى قالوه العرب عننا هنلاقى انهم اجتمع على كذا صفه منها حب العلم والتعلم والنواحى المعرفيه وكده

المصيبه بقى ان المصرين نفسهم مش شافوا كده ولا زكروها على الاطلاق

وكل الصفات اللى قالوها عن نفسهم كانت اجتماعيه

على العموم الصيت ولا الغنى

(مهو مثل مصرى برضوا)