اخلاء طرف وقيام بالعمل

اتنقلت من المدرسه بعد محاولات مريره جدا فى النقل الحمد لله على انى اتنقلت من مدرستى للمدرسه الجديده

لانى كنت مرهقه نفسيا فعلا فى المدرسه القديمه

المهم بقى ان المدرسه القديمه رغم انى اعرف فيها ناس كويسه وبجد هيوحشنونى و بالرغم من انى من الناس العشريه اوى وبيصعب عليها حتى المبانى
الا انى استغربت من نفسى انها مش صعبت عليا ابدا وفعلا مكنش عندى رغبه ابدا انى ابكى على فرقها
بس انا بكيت مش علشنها
علشان الدموع الغير متوقعه اللى شوفتها فى عيون مونيكا وانا بقولها خبر النقل
ربنا يعلم انا بحب البنوته دى اد ايه... بس وجعت قلبى بدموعها على فراقى
عايزه اقولها بحبك اوى يا مونيكا وبجد مش عارفه
بحس انها نسخه منى فى كل شى الحاجات اللى بضحكنا نفسها واللى بتبكينا نفسها
ويبان علينا القوه واحنا دموعنا قريبه

انا مش هبعد عنها اوى ده انا اتنقلت المدرسه اللى جنبهم بس انا عارفه انى بغرق فى الشغل وبنسى نفسى
ويمكن اطول شويه عقبال ما اشوفها بس ده هيبقى صعب عليا اوى
انا مش اعرفها بقالى زمان ..من سنتين بس ويمكن معرفتنا اتوطدت اوى السنه اللى فاتت بس
بس فى ناس تقبلها تحس انك عرفها من زماااااااااااااااااان وكانك كنت صديقهم من اول ما عرفت الصداقه
تمروا بنفس الظروف والذكريات والاحداث وانتم مش تعرفوا بعض
ولما تتقبلوا وتحكوا عن اللى فات والذكريات تتفجؤ من التشابه اللى بيجمع مجرى الحياه بينكم
وهو ده اللى بحسه مع مونيكا
اكتر حاجه بتجمع بينى وبين مونيكا ان خلقنا قليل مش بنحب الرغى الكتير ولا الزن
وكله كوم والزن ده كوم تانى
وكمان الشعور بدرجة الحراره عندى انا وهى عالى اوى احنا اول ناس نحس بالبرد والحر

و مونيكا عليها ندب يا سلام يفطس من الضحك

صديقتى الغاليه امينة مكتبه... ومع ذلك اكتشفت ان صخرة الدويقه وقعت بعديها باسبوع لما بحكيلها ان حسام خطيبى كتب عنها
وشكل المفاجئه عليا وانا بحكيلها كان اكثر اضحكا من اى شئ تانى

وعسل اوى وهى بتسئل بشكل متناهى فى البساطه عن الازمه الماليه العالميه
وده مش علشان الاهتمام المبالغ بالاقتصاد القومى ولا حاجه
بس لان الصور بتاعت سقوط البورصه فى الجرنال اللى مجبره هى انها تختمه كل يوم علشان مكتبة المدرسه لفت نظرها
والاظرف بقى شكلى وانا بستعرض معلوماتى عن الموضوع وازاى انى ببسطلها الشرح علشان يوصلها
رغم انى اصلا انا فاهمه الازمه بالعافيه لكن كنت بحب اوى انها بتدينى وضعى

ويا سلام بقى لما تعرف خبر قديما اصلا وتبقى محوشاه علشان تقوله ليا اول ما اشوفها كانها اكتشفت اكتشاف عظيم

حاجات كتير ممكن اقولها يمكن مش مترابطه ويمكن غريبه بس فى النهايه الافكار جويا اصلا مش مترتبه وانا بكتب على الكى بورد على طول دون تفكير

ببساطه عايزه اقولك يا مونيكا وانا متاكده انك عمرك ما هتقرى اللى بقوله ده(لانها مش بتدخل على النت ابدا)
انك صديقتى الحبيبه جدا جدا وانى بحبك بكل ما تحمله الكلمه من بساطه وعمق