ونجحنا رغم أنف الاخوان اللى رفضوا الإضراب علشان مافيش حد عازمهم عليه ده على أساس انه فرح خالة أم احمد ؟
ونجح رغم أنف التعتيم الإعلامى المبالغ فيه فى التليفزيون الحكومي
اللى بصراحه حاجه تكسف فى ظل انتشار الدش والقنوات الفضائيه الاخباريه
يعنى اللى حتى ما نزلش الشارع .. أكيد شاف الحقيقة فى القنوات دى
فلما تطلع علينا المذيعه فى التليفزيون المصري وتقول إن مافيش أى حاجه
ولا أى مظاهر للإضراب
وإن اليوم كان يوم عمل طبيعى أكتر من اى يوم تانى
وده على أساس إنه اكتر .. بالعند فى اللى أضربوا ولا إيه انا مش فاهمة
المهم الصراحه انا عايزه أشكر كل اهل المحله اللى بصراحه كانت وقفتهم جامدة جداً
ويا رب تستمر الروح اللى كانت بين المصرين فى اليوم ده
5 comments:
بصراحه يا وسام مش عارفه تقصدى إيه بالنجاح
يا ترى إحنا حققنا إيه بالظبط
و ايه هو مقاييس النجاح اللى حسبنا على أساسها نجاحنا
هل حققنا أهدافنا من الإضراب و الأسعار رخصت
و لا الإضراب و التظاهر كان بالنسبة لنا مجرد صرخة لو هو ده فعلا كان هدف الإضراب يبقى إحنا فعلا خسرنا كتير
لإننا ما كناش واضحين من البدايه إحنا عاوزين إيه
بصى يا زهره
افتكر اخر مره كده الشعب المصرى اتفق فيها على حاجه غير طبعا متشات الكوره
؟؟؟؟؟؟؟؟؟؟؟؟
متهيقلى مش فيه
النجاح اللى انا حسيت بيه ان فى بوادر فعلا موجوده ان الشعب ده ممكن يكون لسه فى قلبه نبض
ممكن يقف مع بعض ويتفق على حاجه
...
كمان على حسب زاكرتى عمر ما اضراب اتعمل فى العالم وتانى يوم الصبح كل حاجه بقيت جميله والدنيا بقيت وردى
...
واللى يثبت ان الاضراب ده فعلا كان ناجح هو خوف الحكومه المبالغ فيه جدا منه
وعدد الجيوش الجراره من رجال الامن بالزى العسكرى والمدنى اللى كانوا اكتر بكتير من اللى نزلوا يتظاهروا
وكمان حالة الاعتقلات اللى كانت دايره عمال على بطال بدون اى تميز علشان بس يرهبوا الناس
الاضراب نجح لما التلفزيون الحكومى قام بالتعتيم الكااااااامل عليه
وده وجه نظرى ولكى تحياتى
:)
الشعب المصرى طول عمره متفق انه عايش فى حالة من الذل لا تنتهى حتى لو صوته ما كانش عالى لكن محدش هيختلف إننا عايشين فى غلاء و لا حد هيختلف إن معظم المصريين عايشين تحت خط الفقر بكتير و محدش هيختلف إن طوابير العيش أصبحت عملية إنتحارية بيخوضها المواطن يوميا
لكن يرضى مين اللى حصل من تخريب فى المحلة .. يرضى مين المحلات و العربيات اللى اتكسرت .. يرضى مين الناس اللى ماتت و الأطفال اللى ملهومش ذنب
مش بلوم الشعب على إضرابه لإنى عارفه إنه وصل لحاله الإنفجار
لكن بقول إننا خسرنا كتير و محققناش شىء حتى خوف الحكومة المبالغ فيه مش دليل على نجاحنا فى شىء لإننا ببساطه شعب عاطفى بينفعل مع المواقف فى لحظتها و بعدها كله بيدخل فى سبات عميق و أهى هوجه و هتتنسى مع أول حدث جديد
زهره
كويس انحنا مش مختلفين علىكل اللى انتى قولتيه ده
بس بعد اذنك اتفقنا على اننا عيشين فى ذل هل ده نوع من الرضى؟
والتخريب اللى حصل واللى احنا شوفنها ده
من السزاجه ان احنا نتخيل ان اهل البلد اللى عملوه
بالاضافه الى ان كل الناس اللى ماتت ماتوا برصاص حكومى
اما كونا خسرنا فده مفيش شك فيه
لكن كمان كسبنا ان الحكومه تفهم ان احنا لسه عيشين
وعمر ما كان فى حرب تحرير ولا تغير كانت من غير ضحيا
ولازم روح التضحيه تكون عند كلالناس اللى مؤمنه بالفكره
اما عن الثبات العميق اللى انتى بتقولى عليه وان احنا شعب انفعالى وغير ناضج سياسيا فكل ده كلام حكومه
يعنى ايه شعب عمر ثقافته السياسيه كام قرن ومش ناضج يعنى ايه
قاصر مثلا
كلالكلام ده بيتقال للتقليل من حجمنا قدام الحكومه
احنا موجودين وزعلانين ومدايقين ولازم الناس اللى فوق تفهم ده كويس وتتغير
وسام انا فعلا مش بقول ان الشعب هو اللى خرب البلد و انه هو اللى انتحر بنفسه
لكن ايا كان السبب النتيجة واحده ناس راحت من غير تمن و بلد اتخربت
أما بالنسبة للشعب الناضج سياسيا فعاوزة اقولك إنه طالما هو بالنضج ده ليه وصلنا للوضع ده
و ليه ما رفعش عن نفسه الظلم من زماااااااااان و ليه دلوقتى بالذات لما لقى الحصول على رغيف العيش بقى عملية إنتحارية
إتفرجى على خطاب الدكتور أحمد نظيف فى المحلة و المكافآت الزهيده اللى أخدها عمال غزل المحلة و هللوا لها و فرحوا بها قد ايه لمجرد إنهم مشاركوش فى الإضراب
يا ترى كل العمال دول مش فاهمين إنهم كانوا بينضحك عليهم ؟؟؟
و لا نضجة السياسى ما وصلوش لإن دى مجرد تهدئة للوضع و بعدها هيرجع تانى أسوأ من الأول !!!
Post a Comment